Në homazhet për nder të Fatos Nanos morën pjesë jo vetëm eksponentë të lartë të Partisë Socialiste dhe qytetarë të shumtë, por edhe zyrtarë të opozitës. Ndër ta ishin sekretari i Përgjithshëm i PD-së, Flamur Noka, bashkë me Agron Gjekmarkajn dhe Arjan Ndojën, kreu i Partisë Republikane, Fatmir Mediu, kreu i PAA-së, Agron Duka. Homazhe zhvilloi gjithashtu ish-kryedemokrati Lulzim Basha.
Në ceremoni morën pjesë edhe personalitete politike nga Kosova dhe Maqedonia e Veriut, mes të cilëve Albin Kurti dhe Ali Ahmeti.
Të pranishëm në këto homazhe janë edhe disa nga krerët e besimeve fetare mes tyre kryepeshkopi Joan, Baba Mondi, Arqipeshkvi Arjan Dodaj dhe Kreu i Komunitetit Mysliman të Shqipërisë, Bujar Spahiu.
Po ashtu, të pranishëm ishin edhe familjarë të Fatos Nanos, përfshirë bashkëshorten Xhoana Nano, djalin Sokoli dhe ish-bashkëshorten Rexhina. Homazhet publike nisën në orën 8:30 të mëngjesit, ndërsa nga ora 11:15 deri në 11:45 u zhvilluan homazhe nga personalitete shtetërore dhe trupi diplomatik.
Bashkëshortja e tij Xhoana Nano, i biri Sokol Nano dhe kryeministri Edi Rama mbajtën nga një fjalim përkujtimor. Në respekt të kontributit të tij në jetën publike dhe politike të vendit, data 2 nëntor është shpallur ditë zie kombëtare. Të gjithë flamujt në institucionet shtetërore do të ulen në gjysmë shtizë, ndërsa në orën 12:00 do të ndalojë çdo aktivitet për të mbajtur një minutë heshtje.
Fatos Nano ka drejtuar Partinë Socialiste për 14 vite dhe ka shërbyer si kryeministër i vendit për disa vite me ndërprerje, duke lënë një kontribut të spikatur në jetën politike dhe publike të Shqipërisë.
