Sot në orën 13:00, Gjykata e Posaçme do të shqyrtojë kërkesën e kompanisë Evita të biznesmenit Klodian Allajbeu, të Spitalit Amerikan, si dhe të bashkëpunëtorëve të tij më të ngushtë dhe disa kompanive të tjera që kundërshtojnë kontrollet e SPAK dhe këmbëngulin në kthimin e sendeve të sekuestruara.
Kërkesat do të shqyrtohen nga gjyqtarja e posaçme Elsa Ulliri, e cila më herët firmosi edhe urdhrat e kontrolleve mbi kompanitë dhe bashkëpunëtorët e ngushtë të Allajbeut, përfshirë edhe Onejda Ymeraj.
SPAK është duke hetuar koncesionet në shëndetësi, përfshirë edhe koncesionin e laboratorëve mjekësorë, dhe ka dyshime se, ndonëse është fituar nga një kompani tjetër, kontrollohet në mënyrë të tërthortë nga Klodian Allajbeu.
Në kuadër të hetimeve, SPAK ushtroi kontrolle në kompaninë Evita, si dhe në Spitalin Amerikan dhe disa kompani të tjera që dyshohet se janë të lidhura me njëra-tjetrën. Gjatë kontrolleve u morën dokumente, fatura, kontrata, celularë, si dhe pajisje kompjuterike.
Hetimet po drejtohen nga prokurorja e posaçme Dorina Bejko.
