Kryetari i Grupit Parlamentar të Partisë Demokratike, Gazment Bardhi, ka urdhëruar deputetët e opozitës që të mos marrin pjesë në asnjë mbledhje të komisioneve parlamentare gjatë ditës së nesërme, të hënën më 10 nëntor 2025.
Në një mesazh të dërguar anëtarëve të grupit, Bardhi thekson se pjesëmarrja në komisione do të pezullohet përkohësisht, deri në zhvillimin e mbledhjes së grupit parlamentar në orën 12:30, ku pritet të diskutohet situata e krijuar pas përplasjes në seancën e fundit plenare.
“Nesër, e hënë, datë 10.11.2025, në mbledhjen e Grupit Parlamentar, ora 12:30, NUK duhet të mungojë askush! Nesër, e hënë, derisa të jetë mbledhur dhe të ketë vendosur grupi parlamentar, ASNJË deputet NUK MERR PJESË në mbledhjet e Komisioneve Parlamentare. Ky do të jetë një reagim i përkohshëm i grupit parlamentar nisur nga situata e krijuar në seancën e fundit, derisa Grupi Parlamentar të ketë diskutuar dhe marrë një vendim final. Pra, nesër NUK shkojmë në mbledhjet e Komisioneve Parlamentare,” – thuhet në mesazhin e Bardhit.
Vendimi i grupit demokrat pritet të shënojë një bojkot të përkohshëm parlamentar, në shenjë proteste ndaj zhvillimeve të fundit në Kuvend dhe mënyrës se si është menaxhuar puna parlamentare nga mazhoranca.
