Në një intervistë ekskluzive për Deutsche Welle, ambasadori i Bashkimit Europian në Tiranë, Silvio Gonzato, ka komentuar ndryshimet e propozuara në Kodin e Procedurës Penale që lidhen me pezullimin e zyrtarëve publikë nën hetim.
I pyetur për strategjinë e qeverisë shqiptare për ndryshimin e legjislacionit, që prek pezullimin e kërkesave për heqjen e imunitetit nga SPAK-u, Gonzato theksoi se Bashkimi Europian po e ndjek nga afër këtë proces.
Sipas tij, bëhet fjalë për nenin që i jep mundësi një gjykate të pezullojë një zyrtar publik që është nën hetim. “Çdo gjë që lidhet me sundimin e ligjit dhe administrimin e drejtësisë është diçka që ne e ndjekim nga afër dhe e vlerësojmë, jo vetëm në Shqipëri, por në të gjitha vendet kandidate,” u shpreh ai.
" Ne po e ndjekim nga afër këtë ndryshim të propozuar në Kodin e Procedurës Penale, që është neni që i lejon një gjykate të pezullojë një zyrtar publik që është nën hetim. Sepse çdo gjë që lidhet me sundimin e ligjit dhe administrimin e drejtësisë është diçka që ne e ndjekim nga afër dhe e vlerësojmë, jo vetëm në Shqipëri, por në të gjitha vendet kandidate. Sistemi i drejtësisë është në zemër të punës dhe kërkesave të një vendi në kontekstin e negociatave të anëtarësimit. Pra, ne presim që çdo nismë legjislative të jetë në përputhje me angazhimet e përgjithshme të qeverisë në luftën kundër korrupsionit dhe krimit. Dhe ne do të vazhdojmë të monitorojmë nga afër se si ndikon kjo në këta elementë." u shpreh Gonzato për DW
