Gjykata Kushtetuese e Shqipërisë ka vendosur të pranojë kërkesën e 1/5 së deputetëve të Kuvendit për shfuqizimin e vendimit që ndryshoi rregulloren e Kuvendit lidhur me komisionet e përhershme parlamentare.
Sipas vendimit, Kushtetuesja ka konstatuar shkelje në procedurën e përshpejtuar të ndjekur për miratimin e ndryshimeve, si edhe probleme në mënyrën e thirrjes dhe zhvillimit të mbledhjeve.
“Gjykata pasi mori në shqyrtim pretendimet e palëve, vlerësoi se sa i takon themelit të pretendimeve të kërkuesit, duke vendosur shfuqizimi i vendimit nr.57/2025, për shkak të cënimit të parimit të demokracisë përfaqësuese të lidhur me lirinë e shprehjes së deputetëve si pasojë e shkeljes së rregullave të thirrjes së mbledhjes së Kuvendit si dhe të procedurës së ndjekur për miratimin e aktit object shqyrtimi.
Gjithashtu Gjykata vendosi që efektet e këtij shfuqizimi hyjnë në fuqi 30 ditë pas botimit të vendimit në Fletoren Zyrtare, në mënyrë që gjatë këtij afati, Kuvendit të ketë mundësinë e organizimit të komisioneve parlamentare sipas standarteve për procedurën e miratimit të akteve të përcaktuar në arsyetimin e këtij vendimi”, thuhet në vendim.
Tre ditë pas konstituimit të tij, Kuvendi miratoi me 79 vota pro ndryshimet në rregullore, duke rritur numrin e komisioneve të përhershme parlamentare nga 8 në 11.
Opozita e dërgoi çështjen në Gjykatën Kushtetuese me argumentin se procesi i miratimit zgjati vetëm një orë dhe se deputetëve nuk iu dha mundësia për të paraqitur propozimet apo amendamentet e tyre.
Nga ana tjetër, Kuvendi ka pretenduar se, në kushtet e urgjencës, rregullorja ishte zbatuar në masën e mundshme dhe se procedura e ndjekur ishte në përputhje me situatën e krijuar.
Vendimi i Gjykatës Kushtetuese pritet të ketë ndikim të drejtpërdrejtë në funksionimin e komisioneve parlamentare dhe në praktikën e ndjekur për ndryshimet e ardhshme të rregullores së Kuvendit.
