Gjykata Kushtetuese ka vendosur që çështja e dekretimit të ministres virtuale të Inteligjencës Artificiale “Diella”, të bërë nga Presidenti Bajram Begaj, të kalojë për shqyrtim në seancë plenare. Vendimi është marrë nga Kolegji i Gjykatës mbi bazë të dokumenteve të paraqitura.
Padia u depozitua nga grupi parlamentar i Partisë Demokratike, e cila kërkon shfuqizimin e disa neneve të dy dekreteve presidenciale: atij “Për emërimin e Kryeministrit” dhe atij “Për emërimin e Këshillit të Ministrave”. Opozita argumenton se Presidenti ka tejkaluar kompetencat kushtetuese duke krijuar, përmes dekretit, Ministrin Virtual të Inteligjencës Artificiale “Diella”.
Sipas PD-së, Kushtetuta nuk parashikon ngritjen e një strukture të tillë dhe vetëm Kuvendi ka të drejtë të krijojë ministri të reja. Në argumentimin e saj, opozita thekson se, pavarësisht vlerësimit për inovacionin, projekti “Diella” nuk mund të marrë formë juridike pa një bazë të qartë ligjore.
