Gjykata Kushtetuese ka pezulluar dje zhvillimin e zgjedhjeve të pjesshme lokale në Tiranë. Në një deklaratë për mediat, kreu i Komisionit Qendror të Zgjedhjeve (KQZ), Ilirjan Celiashi, njoftoi se procesi i përgatitjes për zgjedhjet në kryeqytet është pezulluar, ndërsa për 5 bashkitë e tjera – Vlorë, Berat, Tepelenë, Cërrik dhe Mat – procesi vijon normalisht.
“Çdo veprim i KQZ-së që lidhet me zgjedhjet në Tiranë është pezulluar që nga data 9 nëntor. Zgjedhjet në 5 bashkitë e tjera do të zhvillohen sipas planit,” tha Celiashi, duke shtuar se vendimi i GJK ka efekt si të mos ekzistonte përkohësisht dekreti për zgjedhjet në Tiranë.
Ai theksoi gjithashtu se është Kolegi Zgjedhor ai që do të vendosë mbi ankimimin e Partisë Socialiste për zgjedhjet në Tiranë. “KQZ nuk ka tagër për këtë çështje. Do të presim vendimin e Kolegjit Zgjedhor. Ndërkohë, për 5 bashkitë e tjera procesi vazhdon normalisht, dhe partitë mund të paraqesin kandidaturat dhe të sjellin komisionerët e tyre,” tha kreu i KQZ-së.
