Gjykata Kushtetuese është përpara provës së zjarrit për çështjen Balluku. Gjyqtarët kushtetues duhet t’i japin përgjigje pyetjeve: A është në përputhje me Kushtetutën vendimi i GJKKO që pezulloi nga detyra zv.kryeministren dhe Ministren e Infrastrukturës? Apo vendimi është ndërhyrje në punët e ekzekutivit, sikurse pretendon kryeministri? Përmes një vendimi të ndërmjetëm Kushtetuesja vendosi të rikthejë përkohësisht Ballukun në detyrë.
Ndërsa në seancën e 22 janarit dëgjoi argumentat pro dhe kundër për çështjen. Tashmë duhet të shpallë verdiktin. Të martën burimet thanë se për pak minuta anëtarët e Kushtetueses u mblodhën, por nuk arritën në një vendim lidhur me çështjen.
Disa prej tyre kërkuan më shumë kohë të shqyrtojnë argumentat. Kësisoj pritet një mbledhje e dytë. Data dhe ora nuk janë vendosur ende. Por ndërsa sytë janë kthyer nga Kushtetuesja, në dyert e kësaj të fundit kanë hyrë e dalë thuajse i gjithë trupi diplomatik në vend, e me gjasë temë diskutimi ka qenë edhe Balluku.
Kushtetuesja ende s’e ka thënë fjalën e saj, ndërsa nesër në Këshillin e Mandateve dhe Imunitetit do të hapet “petët e lakrorit” dhe do të dalin në dritë se çfarë përmban dosja prej 160 mijë faqesh e SPAK, nëse seanca do të jetë e hapur. Ndërsa ndodhin këto zhvillime, një gjë është e sigurt; orët janë vendimtare për gruan më të pushtetshme të PS-së, ndërsa Kushtetuesja është në qendër të vëmendjes për të dëshmuar vendimmarrje të pandikuar nga politika apo faktorë të tjerë.
