Pas ndarjes 4 me 4 të votave në Gjykatën Kushtetuese, që la në fuqi vendimin e GJKKO-së për pezullimin nga detyra të Belinda Ballukut, ka reaguar Sekretari i Përgjithshëm i Partisë Demokratike, Gazment Bardhi.
Në reagimin e tij, Bardhi deklaron se përpjekjet e kryeministrit për të ushtruar presion mbi drejtësinë dhe për të ndërtuar alibi politike kanë dështuar.
“Alibitë tashmë kanë rënë! Edi Rama ushtroi presion të paprecedentë mbi Gjykatën Kushtetuese dhe ngriti alibi absurde për të mbrojtur veten dhe Belinda Ballukun. Të dyja dështuan!”
Sipas Bardhit, vendimi i Gjykatës Kushtetuese rrëzon pretendimet e kryeministrit për të bllokuar drejtësinë dhe tregon se askush nuk mund të qëndrojë mbi ligjin. Sekretari i Përgjithshëm i PD thekson se tashmë çështja ndodhet në duart e Kuvendit, i cili duhet të veprojë pa vonesa lidhur me kërkesën e SPAK-ut për arrestimin e ish-zëvendëskryeministres.
“Tani, Edi Rama nuk ka më ku të fshihet. Kërkesa e SPAK-ut për arrestimin e Belinda Ballukut pret miratimin nga Kuvendi.”
Bardhi i bën thirrje Kryetares së Kuvendit që të veprojë menjëherë dhe të mos mbajë peng procesin e drejtësisë duke paralajmëruar se çdo vonesë do të përbënte një përgjegjësi të rëndë institucionale për Kuvendin.
