Kryetari i grupit parlamentar të PD, Gazment Bardhi, ka reaguar pas dekretimit të datës së zgjedhjeve nga Presidenti Bajram Begaj për 6 bashkitë e vendit.
Bardhi shprehet se Presidenti veproi në shkelje të Kushtetutës, duke e cilësuar vendimin si “puç kushtetues” që dëmton autoritetin e Gjykatës Kushtetuese.
Sipas tij, zgjedhjet e pjesshme në Tiranë janë futur në një ngërç ligjor, ndërsa Begaj nuk është i pavarur, por i komanduar nga kryeministri Edi Rama.
Kujtojmë se dekreti i Begajt gjen opozitën ende pa emra zyrtarë për bashkitë që do të mbahen zgjedhjet.
Reagimi i plotë:
Asnjë surprizë nga Bajram Begaj!
Ashtu siç kishim paralajmëruar, Bajram Begaj nuk është President i shqiptarëve, por një robot që komandohet nga Edi Rama. Me shkeljen e rëndë që ka kryer sot ndaj Kushtetutës, Presidenti i Republikës ka kryer një puç kushtetues sepse ka rrënuar edhe autoritetin e Gjykatës Kushtetuese të Shqipërisë dhe themelet mbi të cilat ndërtohet shteti i së drejtës.
Zgjedhjet e pjesshme në Bashkinë Tiranë janë futur në një ngërç kushtetues për shkak të aktit të sotëm të Presidentit të Republikës. Juridiksionin e shqyrtimit të ankimit ndaj VKM-së së shkarkimit nuk e cakton Edi Rama në relacion, por Kushtetuta e Republikës së Shqipërisë. Një mandat kushtetues nuk mund të ndërpritet veçse për shkaqet e parashikuara shprehimisht në Kushtetutë dhe kjo i nënshtrohet kontrollit kushtetues.
Askush në 35 vjet demokraci nuk e ka dëmtuar kaq shumë reputacionin e Kreut të Shtetit. Arsyet janë tërësisht banale: Edi Rama ka marrë peng Bajram Begajn, dhe e komandon atë njëlloj si “Diellën”!
