Kreu i grupit parlamentar të PD, Gazment Bardhi, ka kritikuar Komisioneren e Zgjerimit të BE-së, Marta Kos, pas një interviste të saj në Politico, ku sipas tij ajo ka bërë bashkëpërgjegjëse shoqërinë shqiptare për korrupsionin në vend.
Në reagimin e tij, Bardhi e cilëson të papranueshëm një përgjithësim të tillë dhe i drejtohet komisioneres duke theksuar se shqiptarët nuk e pranojnë korrupsionin dhe se përgjegjësia për të, sipas tij, është personale e kryeministrit Edi Rama.
“Shoqëria shqiptare nuk e pranon korrupsionin, shqiptarët nuk janë të korruptuar. Përgjegjësia për korrupsionin dhe pranimin e mbrojtjen e tij është vetëm personale e Edi Ramës”, shprehet Bardhi.
Ai shton se rastet e korrupsionit në qeveri nuk janë mbrojtur nga qytetarët, por sipas tij nga kryeministri dhe deputetët e mazhorancës në Kuvend.
Bardhi akuzon gjithashtu se pengesat ndaj luftës kundër korrupsionit nuk vijnë nga shoqëria shqiptare, por nga ndërhyrjet politike në hetime.
Në fund të reagimit, kreu i grupit demokrat i kërkon institucioneve europiane të distancohen nga çdo përgjithësim që, sipas tij, cenon shoqërinë shqiptare, të cilën e cilëson si një nga më proeuropianet në botë.
