Kandidati i pavarur për Bashkinë e Tiranës Florian Binaj në një intervistë për Top Story foli dhe për fotot që qarkullojnë me Edi Ramën dhe Erion Veliajn, duke sqaruar rrethanat në të cilat janë bërë ato.
“Me Ramën dola në foto në një organizim të FRESSH-it. Në atë periudhë, të gjithë thonin që Rama ishte e vetmja zgjidhje që mund ta shpëtonte vendin. Duke qenë imitues i tij, bëra një skeç dhe më pas ndodhi një moment ku ai më dha një mandarinë. Takimin e fundit me Ramën e kam pasur në vitin 2015; që nga ajo kohë nuk e kam takuar dhe as folur më me të. Ne besonim në atë kohë tek ai, sepse nuk e kishim provuar ende, por më pas u zhgënjeva me atë që ndodhi,” u shpreh Binaj.
Sa i përket fotos me Erion Veliajn, aktori sqaroi se ajo daton rreth viteve 2014–2015, kur Veliaj ishte ende ministër.
“Foton me Veliajn e kam ose në 2014 ose në 2015. Më mori një zonjë që punonte në zyrën e pritjes së moshës së tretë dhe më ftoi në një aktivitet ku shërbeja ushqim për të moshuarit. Ndërsa isha aty, papritur u shfaq Veliaj dhe tha ‘shpejt, një foto’. Nuk e dija që ishte aty, dhe s’e kisha si të reagoja ndryshe. Plus, në atë kohë ai nuk ishte ai që është sot, nuk kishte bërë ende ato që ka bërë më vonë. Pas asaj, nuk kam qenë më kurrë me të,” deklaroi Binaj.
