Në kuadër të punimeve të Bordit të Paqes, gjeneral majori amerikan Jasper Jeffers deklaroi se disa shtete kanë shprehur gatishmërinë për të kontribuar me ndihmë ushtarake për stabilizimin e situatës në Gaza.
Sipas tij, synohet krijimi i pesë sektorëve të sigurisë dhe ngritja e një Force Sigurie me rreth 12 mijë efektivë, mes policësh dhe ushtarësh.
Jeffers bëri me dije se pesë shtete do të kontribuojnë me trupa dhe personel policor: Indonezia, Maroku, Kazakistani, Kosova dhe Shqipëria. Ndërkohë, Shqipëria dhe Kosova kanë marrë përsipër të ofrojnë trajnime për policët që do të përfshihen në këtë strukturë të re sigurie.
Deri më tani, sipas deklaratës së gjeneralit amerikan, janë regjistruar rreth 2 mijë aplikime nga palestinezë që kërkojnë të rekrutohen në Forcën e Sigurisë në enklavë.
Nisma synon ndërtimin e një arkitekture të re sigurie në terren, në funksion të stabilizimit të situatës dhe krijimit të kushteve për administrim dhe rend publik në Gaza.
