Kryetari i Partisë Demokratike, Sali Berisha, u shpreh nga Lezha se opozita nuk i ka dhënë “drurin” e duhur qeverisë së Edi Ramës për ta larguar nga pushteti. Në takimin e radhës që zhvilloi në kuadër të turit të Foltores, kreu i PD-së tha se arritja e opozitës qëndron në faktin se ka treguar se qeveria Rama është armike e vullnetit të lirë të shqiptarëve.
“Kemi qartësuar për çdo shqiptar se armiku i vullnetit të shqiptarëve e ka emrin Rama; se ka grabitur mandate me të gjitha mënyrat; se qëndron në pushtet si përfaqësues i karteleve më të rrezikshme të drogës në Shqipëri dhe Evropë. Që një qeveri të qëndrojë në pushtet pa legjitimitet, qëndron për shkak se opozita nuk i ka dhënë drurin që meriton”, tha ai.
Një prej demokratëve ngriti shqetësimin për mungesën e kontaktit të drejtuesve të PD-së me bazën, duke theksuar se për rreth tetë muaj nuk ka pasur komunikim të mjaftueshëm, çka sipas tij dëmton jetën e brendshme të partisë.
“Si nuhatës i mirë i politikës që je, e ke nuhatur ndonjë fije që ka shumë shkëputje nga baza. Domethënë, u bënë tetë muaj që nuk keni kontakte me bazën, ndërkohë që kjo bazë e mban PD-në gjallë. Unë besoj se kjo vjen për shkak të keqinformimit që bëhet që nga numri dy e poshtë, kryesisht nga drejtuesit e qarqeve, të cilët janë të emëruar, janë në lista të mbyllura dhe besoj se nuk i njohin mirë as drejtuesit, as demokratët”, u shpreh një nga pjesëmarrësit.
Një tjetër pyetje kishte të bënte me çështjen e lidershipit dhe dorëzimin e stafetës. Duke mos e vënë në dyshim se ai do të jetë në krye të PD-së derisa të jetë gjallë, Berisha foli për pasardhësin kur ai të mos jetë më në këtë jetë duke deklaruar se nuk synon të lërë trashëgim as familjarët e tij.
“Tani, të them me sinqeritet, e vetmja gjë që nuk e bëj dot kurrë është pasardhësi. Nuk është reale. Nuk kam ndërmend të lë pasardhës as vajzën, as djalin tim. Pasardhës do të lë atë që zgjidhni ju dhe që e besoni më shumë”, u shpreh Berisha.
Megjithatë, mbetet për t’u parë se sa do t’i qëndrojë kreu i PD-së këtij premtimi ndërsa nuk harroi ti tregojë dhe njëherë vijën e kuqe Ervin Salianjit:
“Debatet i kemi të hapura. Por një gjë: në qoftë se ti vrapon për interesa private dhe flet në emër të PD-së, do të përfundosh njëlloj si ata të tjerët dhe pa asnjë emër”, tha Berisha.
Në fund, kreu i PD bëri thirrje që demokratët t’i bashkohen protestës kombëtare që do të mbahet më 24 janar para kryemnistrisë.
