Vetëm 20 minuta zgjati Foltorja e shtatë e Partisë Demokratike para Kryeministrisë, e cila ishte një kopje e atyre të mëparshmeve, me akuzat e zakonshme të kreut të PD, Sali Berisha.
Para pak mbështetësve, të cilët i ftohti i kishte rudhur në numër akoma më shumë, kryedemokrati tha se regjimin në Shqipëri, kudo që ta prekësh, rrjedh vetëm vjedhje.
“Ne kemi përballë sot regjimin më karikaturial, më të turpshëm, më të dekompozuar në Europë dhe në botë. Regjimin, që kudo që ta prekësh, rrjedh vjedhje, vjedhje dhe vetëm vjedhje të shqiptarëve. Regjimin, i cili mbahet në këmbë me mashtrime, me propagandë, me trillime,” tha Berisha.
Në tentativë për të bërë një paralelizëm me situatën e protestave në Iran, Berisha tha se rrugët e Teheranit janë të mbushura me opozitarë të guximshëm dhe sipas tij, këtë do të bëjë edhe Partia Demokratike.
“Prej dy javësh, rrugët e Teheranit dhe qyteteve të tjera të Iranit janë të mbushur me opozitarë të guximshëm, trima, të cilët, pavarësisht nga masakrat, breshëritë e ajatollahëve obskuranistë, ecin të sigurtë drejt fitores. Dhe ne këtu vijmë sepse kemi këtë besim. Sepse besojmë në idealet tona të drejta. Dhe se besojmë se këto ideale do triumfojnë së shpejti,” tha ai.
Por krahasimet e Berishës duket se janë sa për retorikën e radhës politike, sepse në realitet protestat e PD-së jo vetëm që nuk kanë intensitetin e duhur dhe madhësinë si në Iran, por nuk ushqejnë as shpresë tek qytetarët për ta mbështetur.
Problemin, të cilin Berisha e di por duket se refuzon ta zgjidh, e ngriti një nga të rinjtë e FRPD që mori fjalën në Foltore. Ai kritikoi mënyrën se si po menaxhohet partia, duke u shprehur se PD po riciklon dhe nuk po rigjeneron breza.
“Edhe sot e gjykoj të gabuar imponimin kundrejt demokratëve të disa figurave të papëlqyera mes nesh. Madje i gjej krejt pa vend gradimin e tyre në pozita drejtuese brenda PD apo Grupit Parlamentar. Shkelmuam pa kuptim procesin që vet e pompuam aq fort si shembull të demokracisë së brendshme, Primaret. Ju morëm hakun disa prej më të votuarve. Koncepti i demokratëve monark pas karriges, sidomos karriges opozitare, nuk i shkon PD si koncept. Çdokush ka një cikël politik. Të gjithë jemi të zëvendësishëm, dhe PD po riciklon, nuk po rigjeneron breza. Ndaj dhe në fund i morëm rezultatet zgjedhore,” u shpreh anëtari i PD.
