Kandidati i pavarur për Bashkinë e Tiranës, Florian Binaj, ka reaguar pas mbështetjes së shpallur nga Partia Demokratike, “Shqipëria Bëhet” dhe Nisma Thurje.
“Falënderoj për mbështetjen që i dha kandidimit tim si kandidat i pavarur Partia Demokratike, Shqipëria Bëhet dhe Nisma Thurje. Mbetem i hapur për çdo mbështetje që do të vijë nga forcat opozitare,” shkruan Binaj.
Ai shprehet mirënjohës edhe ndaj qytetarëve të kryeqytetit që, sipas tij, e kanë inkurajuar në ditët e fundit: “Dëshiroj mbi të gjitha të falënderoj mijëra qytetarë të Tiranës, të cilët më kanë inkurajuar këto ditë. Kjo garë është për ju!”
“Unë nuk jam politikan, jam qytetar dhe partia ime jeni ju,” vijon aktori, duke theksuar se deri më sot ka luftuar padrejtësinë me humorin dhe artin e tij, ndërsa tani e fton publikun ta bëjë këtë përmes votës.
“Të dënojmë ata që na vodhën dhe bënë humor me ne! Ju ftoj të bëjmë bashkë mendjet dhe zemrat kundër pushtetit që po dhunon jetët dhe të ardhmen e fëmijëve tanë,” përfundon reagimi i Binajt.
