Pas mbledhjes së sotme të kryesisë së Partisë Demokratike, ku janë shënuar debate të ashpra mes Ervin Salianjit, Sali Berishës dhe Flamur Nokës, ky i fundit ka folur për gazetarët. Noka ka shmangur komentet mbi përplasjet brenda mbledhjes, duke u ndalur te mesazhi politik kundër qeverisë.
I pyetur për qëndrimin e tij lidhur me votën pro ndaj kërkesës së kryeministrit për anëtarësimin në Gjykatën Kushtetuese të Sonila Bejtjas, e konsideruar si e preferuara e Sali Berishës, përgjigjja e Flamur Nokës ishte e shkurtër dhe ironike: “Te fala Karlos”.
Më pas, në deklaratën e tij publike, Noka tha se mbledhja kishte si qëllim diskutimin dhe vendosjen në transparencë për shqiptarët të zhvillimeve të fundit.
“Ky takim kishte si qëllim për të diskutuar dhe për t’i vënë në transparencë shqiptarëve sulmin e këtyre ditëve dhe presionin që i është bërë Gjykatës Kushtetuese. Reforma në drejtësi ka vdekur, Edi Rama është legjislativi dhe narkosi,” u shpreh Noka.
Ai bëri thirrje për mobilizim qytetar, duke njoftuar protestën e radhës së opozitës. “I bëjmë thirrje shqiptarëve që më 22 dhjetor, në orën 17:00, të vërshojnë në bulevard. Nuk do të jetë vetëm një protestë, do të vijojmë protestën. Pa zgjedhje të lira asgjë tjetër nuk ka kuptim dhe as demokracia,” deklaroi ai.
I pyetur nga gazetarët nëse gjatë mbledhjes i është kërkuar dorëheqja, Flamur Noka reagoi duke e zhvendosur fokusin te ajo që e cilësoi si axhenda reale e opozitës.
“Unë po flas këtu për agjendën e PD-së, ju po flisni për agjendën e qeverisë. Sot dorëheqja e vetme që kërkohet nga gjithkush është ajo e Edi Ramës. Asnjë tjetër nuk e qetëson shpirtin e shqiptarëve të vjedhur. Dorëheqja ime apo e dikujt tjetër qetëson vetëm Ramën dhe shërbëtorët e tij, kjo është mëse e qartë,” tha Noka.
Duke iu referuar firmave për Avokatin e Popullit, ai shtoi se Partia Demokratike ka kërkuar ndjesë publikisht. “Për firmat për Avokatin e Popullit ne kërkuam ndjesë,” u shpreh ai.
Në përgjigje të pyetjes nëse e ndjen veten përgjegjës për këtë situatë, Noka kërkoi durim dhe sqaroi pozicionin e tij. “Kini durim. Ne kemi kërkuar ndjesë, kanë kërkuar edhe shumë nga firmëtarët. Ndjesa është për arsye sepse në ngutje e sipër dhe në një moment emocional, që lidhej me çështjen e Bashkisë… Flamur Noka ka debatuar me çdo firmëtar, është kundër dhe është shprehur kundër. Kam qenë ndër të vetmit që kam kërkuar llogari,” përfundoi ai.
