Ish-ministri i Mbrojtjes, Fatmir Mediu, i cili akuzohet si një nga përgjegjësit e tragjedisë së Gërdecit me 26 të vrarë e qindra të plagosur, kërkon përjashtimin e gjyqtares së posaçme Irena Gjoka. Në kërkesën e depozituar, Mediu pretendoi se gjyqtarja Irena Gjoka nuk mund të ishte gjyqtare e çështjes, referuar kjo një vendimmarrjeje të gjykatës së lartë.
Mbrojtësi ligjor pretendon se gjyqtarja paraprake mund të jetë gjyqtare e çështjes në themel vetëm kur gjykimi është i shkurtuar, jo i zakonshëm, si në rastin e Mediut. Ish-ministri i Mbrojtjes është nën akuzë për shpërdorim detyre kryer në bashkëpunim me kuadrin ushtarak komandues lidhur me ngjarjen e 15 marsit 2008 në Gërdec, ku nga shpërthimi i një punishteje demontimi armësh u vranë 26 persona, përfshirë edhe fëmijë, u plagosën qindra të tjerë dhe u shkaktuan miliona euro dëme.
