Kreu i Partisë Demokratike, Sali Berisha, ka paralajmëruar se në protestën kombëtare të 10 shkurtit nuk përjashtohet edhe mundësia e “ngujimit” në Bulevard.
Në deklaratën për mediat, para mbledhjes me grupin parlamentar të PD, Berisha tha se këtë po e kërkojnë qytetarët dhe kjo do të jetë çështje diskutimi.
“Janë më qindra demokratë që më thonë ‘nuk duhet të largohemi nga Bulevardi pa larguar Edi Ramën’. Drejt asaj do shkojmë në mënyrë të pashmangshme. Ky moment duhet të jetë çështje e diskutimit tonë të gjerë me qytetarët dhe popullin opozitar”, tha Berisha.
Teksa akuzoi mazhorancën dhe qeverinë për aferat e panumërta, ai shtoi se “e gjithë Evropa dhe Bota po pret protestën e PD”.
Kryedemokrati gjithashtu tha se Ergys Agasi i Policisë është Ilir Proda, i zgjedhur nga krimi i organizuar dhe përfaqësues i tyre.
