Ervin Salianji do të sfidojë zyrtarisht Sali Berishën në garën për kryetar partie që do të zhvillohet në maj. Burime të VNA konfirmojnë se zoti Salianji do të jetë kandidat zyrtar në garën e shpallur sot nga PD dhe se do të regjistrohet për të qenë pjesë e saj.
Prej disa muajsh ish-deputeti i PD nuk e ka fshehur ambicien e tij për të marrë një rol drejtues në partinë më të madhe të opozitës dhe ka organizuar dhjetëra takime të suksesshme me demokratë në qytete të ndryshme të vendit.
Pas këtyre takimeve, në fakt, Sali Berisha e shpalli Salianjin “non grata”, duke e cilësuar si një person që ka shkelur “vijat e kuqe” të partisë. Me gjasë ky përcaktim lidhet pikërisht me afrimin e procesit të zgjedhjeve për kryetarin e ri të PD, për të cilin në fakt, bazuar në statut, Sali Berisha nuk duhet të kandidojë, pasi në statutin e PD thuhet qartë se kryetari që drejton partinë dhe humb në zgjedhjet e përgjithshme largohet nga drejtimi pa të drejtë rikandidimi.
Por meqë PD është praktikisht dhe zyrtarisht pronë e Sali Berishës, askush nuk mund ta sfidojë atë në pronën që ka mbajtur për 35 vjet me radhë. Përveç ndonjë kandidati fals, që zakonisht Berisha e zgjedh vetë, që gara të mos jetë me një kandidat të vetëm.
