Pas mbledhjes së qeverisë, ministri për Pushtetin Vendor, Ervin Demo, dha atë që u paraqit si një lajm i mirë: sot do të mblidhet Bordi i Transparencës për të rishikuar çmimet e karburanteve.
Mbledhja e bordit vjen si një reagim i vonuar ndaj lëvizjeve në tregjet ndërkombëtare, të cilat në Shqipëri zakonisht reflektohen shumë më shpejt në rritje sesa në ulje në pikat e karburantit.
Ndërkohë që disa vende kanë ndërmarrë masa konkrete, si ulja e taksave për karburantet, Shqipëria pas disa javësh rritjeje çmimesh vendos të bëjë atë që di më mirë: të mbledhë bordin. Pa asnjë garanci se kjo do të ketë ndonjë ndikim real në uljen e çmimit të naftës, benzinës apo gazit.
Rritja e çmimeve lidhet edhe me tensionet në Lindjen e Mesme. Pas shpërthimit të konfliktit në Iran, tregjet globale të energjisë pësuan një goditje të fortë, duke çuar në shtrenjtimin e “arit të zi” në bursat ndërkombëtare.
Në Shqipëri, ndërkohë, qytetarët presin të shohin nëse mbledhja e radhës e Bordit të Transparencës do të prodhojë më shumë se sa një njoftim.
