Aulon Kalaja ka publikuar sot në Facebook fletë-thirrjen e gjykatës, duke bërë me dije se është paditur për shpifje nga kryebashkiaku i Tiranës, Erion Veliaj, dhe se seanca gjyqësore ndaj tij është caktuar për datën 6 nëntor, ora 10:00, në Gjykatën e Shkallës së Parë Tiranë.
Kalaja shkruan se Veliaj duhet të flasë për kryeministrin Edi Rama “nëse do t’i bëjë ndonjë nder Shqipërisë”, ndërsa thekson se nuk trembet nga kjo padi dhe se është gati të përballet në gjykatë.
Në deklaratën e tij ai thotë ndër të tjera:
“Ka disa kohë që i kam bërë thirrje Erion Veliajt që një herë në jetën e vet, nëse do t’i bënte të paktën një nder Shqipërisë, është që të fliste ato që di për Edi Ramën.
Por Erion Veliaj nuk ka paditur Edi Ramën, por më ka paditur mua në gjykatë për shpifje!
Nëse mendon se me të tilla metoda mund të më frikësosh, gabohesh. Përballë do më kesh dhe përpara do të kem. Harroje se unë bëj marrëveshje. Lufta ime është publike dhe pa kompromis.”
Kalaja deklaron se nuk ka frikë nga procesi dhe se “nuk ka pyetur as për bandat dhe as për shefat e tyre”, duke shtuar se në gjyq do të “vërtetojë çdo fjalë”.
Seanca pritet të zhvillohet më 6 nëntor, ku sipas thirrjes së publikuar, Veliaj do të jetë palë e dëmtuar në procesin penal ndaj Kalajas. Deri tani, nga ana e Veliajt nuk ka një reagim publik.
