Gjykata e Posaçme rrëzoi kërkesën e kryebashkiakut të Tiranës, Erion Veliaj, për zëvendësimin e masës së sigurisë nga “arrest në burg” në një masë më të lehtë. Në seancën e kësaj të diele ishte i pranishëm vetë kryebashkiaku i Tiranës, i cili pretendoi se nuk ekziston asnjë rrezik për prishjen e provave, për shkak se hetimi është përfunduar dhe dosja është dorëzuar në gjykatë, si dhe se nuk ka mundësi të intimidojë dëshmitarët apo të largohet jashtë vendit.
Pretendimet e tij u kundërshtuan nga dy prokurorët e SPAK, Altin Dumani dhe Ols Dado. Pas dëgjimit të palëve, Gjykata vendosi të rrëzojë kërkesën e kryebashkiakut, çka do të thotë se ai do të vijojë të qëndrojë në qelinë e paraburgimit.
Veliaj u arrestua në zyrën e tij të punës në Bashkinë e Tiranës më 10 shkurt 2025. SPAK ka përfunduar hetimet dhe ka ngritur ndaj tij 13 akuza penale. Dosja e Veliajt, bashkëshortes së tij dhe 28 të pandehurve të tjerë po shqyrtohet në seancë paraprake në Gjykatën e Posaçme. Ndërkohë, Veliaj pret edhe një vendim nga Gjykata Kushtetuese, ku ka dërguar tashmë çështjen lidhur me masën e sigurisë.
