Pas 9-muajsh izolim dhe largë daljeve të tij mediatike, kryebashkiaku Erion Veliaj shfrytëzoi foltoren në Gjykatën Kushtetuese për të folur për pretendimet dhe për të shprehur hallin që ka me drejtësinë. Veliaj e ka cilësuar vendimin e shkarkimit për “mungesë tre mujore në detyrë” si fyerjen më të rëndë të jetës që i ka ardhur nga bashkëpunëtorët e tij.
“Arsyeja për të më larguar për mungesë tre mujore në detyrë është fyerja më e rëndë e jetës sime, sepse erdhi nga bashkëpunëtorët e mi, ata që më njohin më mirë se kushdo tjetër, dhe as nuk më njoftuan e as nuk më dëgjuan. Zoti i faltë, sepse nuk dinë çfarë bëjnë. Lutem për ta çdo natë,” u shpreh Veliaj.
Ai më tej nuk i kurseu fjalët propagandistike, duke thënë se personi i vetëm që mund të ankoheshte për mungesën e tij ishte nëna dhe familja, pasi, siç tha ai, “djalin e kanë takuar më shumë në burg se në liri.”
Veliaj gjithashtu tha se të shkonte në burgun e Durrësit nuk ishte zgjedhja e tij, por e atyre që donin ta shihnin pas hekurave dhe jo me lopatë në dorë.
“Mosprezenca ime nuk ishte zgjedhje. Nuk zgjodha të vetë-internohem në burgun e Durrësit, por më u imponua nga shteti. Ata donin të më shihnin me pranga në duar, e jo me lopatë në duar, siç më ka parë Tirana për një dekadë,” u shpreh ai.
Komunikimi i Veliajt ishte i pari pas kaq shumë vitesh, live dhe pa kaseta të përgatitura për mediat.
Ndërkoh, Gjykata Kushtetuese pritet të vendosë në ditët në vijim nëse do të pranojë ankesën e Veliajt apo do të lërë në fuqi vendimin e qeverisë për shkarkimin e tij si kryebashkiak i Tiranës.
