Deputeti socialist Erion Braçe është i vetmi nga mazhoranca, dhe ndoshta edhe nga opozita, që duket të jetë i shqetësuar për protestat e vazhdueshme të minatorëve të Spaçit. Sot ai iu bashkua atyre para Kuvendit, duke kërkuar me të drejtë që ministria përgjegjëse të detyrojë kompaninë të pranojë kërkesat e tyre.
“Ministria e Punës duhet të bëjë atë që i ngarkon ligji: jo të zbusë situatën, por të garantojë zbatimin e Kushtetutës nga kontraktori i shtetit shqiptar për shfrytëzimin e vendburimit. Pra, duhet të detyrojë kompaninë të njohë sindikatën tuaj dhe përmes saj t’i përfaqësoheni për të gjitha të drejtat tuaja. Kjo është themelore”, tha Braçe.
Megjithatë, paradoksi është i qartë, fjalët janë të bukura, mbështetja për minatorët e drejtë, por Braçe si pjesë e mazhorancës duket se qëndron vetëm tek retorika. Nëse do ta kishte marr vërtet seriozitet problemin e tyre, e ka më të lehtë ta adresonte shqetësimin brenda qeverisë ku bën pjesë dhe, mbi të gjitha, në grupin parlamentar të PS-së, i cili rrallë e ka marrë parasysh statusin e minatorëve, edhe kur çështja është propozuar në Kuvend.
Pra, për të qenë i sinqertë edhe me veten, edhe me kauzat që mbështet, Braçe duhet ose të ngrejë kërkesat e minatorëve në institucionet ku është pjesë. Nëse kolegët e tij refuzojnë ta dëgjojnë edhe atë, atëherë të largohet nga grupi parlamentar i PS. Sepse nuk mund të protestosh me minatorët dhe njëkohësisht të jesh pjesë e një grupi që as nuk përpiqet t’i dëgjojë.
