Deputeti socialist Erion Braçe duket se ka hyrë zyrtarisht në fazën e zbulimit të problemeve të Tiranës, pikërisht pasi vendosi të vetëofrohet publikisht si kandidat potencial për Bashkinë e kryeqytetit.
Pas më shumë se një dekade në pushtet si pjesë e mazhorancës socialiste, Braçe tregoi në “Kjo Javë” se tashmë është shqetësuar seriozisht për korsitë e biçikletave, motorrët, makinat, mungesën e shërbimeve dhe faktin që “Tirana as nuk qeveriset dhe as vetëqeveriset”.
Pra me pak fjalë, qyteti që Partia Socialiste administron prej vitesh paska probleme të mëdha. Dhe çuditërisht kjo u bë më e dukshme pikërisht në momentin kur nisi diskutimi për pasuesin e Erion Veliajt.
Braçe foli edhe për mungesën e demokracisë në PS, duke thënë se partia është kthyer “në një mur ku vendosen njoftime” dhe jo në një strukturë me garë e procese demokratike. Një kritikë e rrallë në një parti ku prej kohësh vendimet më të rëndësishme zbresin si njoftime dhe jo si votime.
Madje ai bëri kujdes të sqaronte se nuk e sheh Edi Ramën si “mbret”, ndonëse pranoi indirekt se ka nga ata që e mendojnë të tillë. Një përshkrim ironik për mënyrën si funksionon realisht pushteti në PS, ku kryeministri kontrollon qeverinë, partinë, listat dhe praktikisht çdo vendimmarrje politike.
Në fund lind pyetja: Braçe po kandidon për të ndryshuar mënyrën si qeveriset Tirana, apo thjesht po përpiqet të bindë publikun se bashkia e drejtuar politikisht nga e njëjta shumicë e Edi Ramës do funksionojë më mirë… me një administrator tjetër po me bekimin e Ramës?
