Deputeti socialist Erion Braçe ka paraqitur një kërkesë zyrtare në Komisionin Qendror të Zgjedhjeve, ku kërkon të marrë informacion të detajuar mbi numrin e votave që ka siguruar në të gjitha palët zgjedhore në të cilat ka kandiduar si deputet.
Braçe kërkon të dijë rezultatin e votimit për të që prej vitit 1996, kur u zgjodh për herë të parë deputet në qarkun e Beratit, si edhe për mandatet e tij të fundit në Lushnjë. Kërkesa është dorëzuar në KQZ më 24 mars.
Vetëm katër ditë më vonë, më 28 mars, gjatë mbledhjes së Asamblesë së PS në Njësinë 5, Braçe deklaroi publikisht ambicien për të kandiduar për postin e kryetarit të Bashkisë së Tiranës.
“Nuk gjejnë zgjidhje problemet që kanë socialistët dhe ka nevojë për një organizim ndryshe. Ndaj në këtë situatë unë do dal të kërkoj mbështetjen e socialistëve jo vetëm të njësisë 5, por në gjithë Tiranën”, mësohet të ketë thënë Braçe në mbledhjen e grupit parlamentar.
Kërkesa në KQZ shihet si një lëvizje që paraprin zyrtarizimin e synimit të tij për të hyrë në garën për drejtimin e kryeqytetit.
