Deputetja e Partisë Demokratike, Elda Hoti, ka kërkuar ndjesë publike ndaj demokratëve dhe mbështetësve të opozitës, pas firmës së dhënë për kandidaturën e Endri Shabanit si Avokat i Popullit.
Në reagimin e saj, Hoti sqaron se firma është dhënë vetëm për qëllimin e dëgjimit të kandidatit në seancën dëgjimore të Komisionit të Ligjeve, por sipas saj, ajo u keqpërdor politikisht nga mazhoranca.
“Ndjesë të sinqertë demokratëve, opozitarëve dhe mbështetësve tanë për një firmë të dhënë vetëm për t’u dëgjuar në seancë dëgjimore në Komisionin e Ligjeve, një firmë që më pas u keqpërdor nga Edi Rama dhe Taulant Balla për të miratuar kandidaturën ilegjitime të Endri Shabanit”, shprehet deputetja e PD-së.
Hoti thekson se, pavarësisht tërheqjes zyrtare të firmave, kryeministri Edi Rama ka vijuar procesin e zgjedhjes së Avokatit të Popullit, duke e konsideruar atë në kundërshtim me Kushtetutën dhe standardet demokratike.
