Partia Demokratike ka vendosur të riorganizojë strukturat e saj në jug të vendit duke caktuar Aurel Bylykbashin si drejtues politik për qarkun e Vlorës. Vendimi është bërë zyrtar nga kryetari i PD-së, Sali Berisha, ndërsa lajmi është konfirmuar edhe nga strukturat lokale të partisë.
Sipas burimeve nga Partia Demokratike, Dega Vlorë, emërimi vjen në kuadër të një procesi riorganizimi të strukturave dhe përpjekjes për të forcuar organizimin politik të partisë në këtë qark.
Ndërkohë, në vijim të këtij procesi, dega e PD-së në Vlorë ka njoftuar edhe zhvillimin e zgjedhjeve për kryetarin e ri të degës, një hap që synon ristrukturimin dhe aktivizimin e mëtejshëm të strukturave lokale të partisë.
Megjithatë, përtej gjuhës zyrtare të organizimit dhe ristrukturimit, vendimi ka edhe një element që nuk ka kaluar pa u vënë re: pas largimeve të shumta nga dega e PD Vlorë drejtë PS, duket se selia qendrore ka menduar që të marrë një politikan nga Elbasani për të drejtuar demokratët në këtë qarkë.
Tani mbetet për t’u parë jo vetëm se si do të funksionojë ky organizim i ri brenda PD-së në qarkun jugor, por edhe se çfarë barsoletash do të prodhojë Vlora për një drejtues politik që vjen nga Elbasani për t’i udhëhequr.
