Zjarri që shkrumboi një pallat në Tiranë ende nuk ka një përfundim zyrtar nga hetimet. Por kjo nuk e pengoi kryeministrin Edi Rama të japë versionin e tij për shkakun.
Sipas tij, bëhet fjalë për një “shkëndijë” dhe për një fatkeqësi që “nuk ka lidhje me ndërtimin”. Një konkluzion i qartë, i dhënë para se organet e hetimit të kenë nxjerrë përgjegjësitë dhe shkaqet e plota të zjarrit.
Në të njëjtën kohë, Rama sulmoi edhe ata që i quajti “gjithologë” dhe “ekspertë publikë pa licenca”, të cilët, sipas tij, dalin në media sa herë ndodh një ngjarje e rëndë.
Ndërkohë, ai njoftoi se godina e djegur do të rindërtohet 100% nga ndërtuesi dhe se banorët do të përfitojnë bonus qiraje deri sa të kthehen në shtëpitë e tyre.
Pra, ndërsa hetimi ende nuk ka përfunduar, një gjë duket se është sqaruar tashmë: për kryeministrin, ndërtimi është i pafajshëm. Përfundimi i hetimit mbetet vetëm një formalitet.
