Kryeministri Edi Rama ka reaguar sërish pas deklaratës së Byrosë Kombëtare të Hetimit (BKH), e cila bëri të ditur se nuk ka pasur përplasje mes agjentëve të saj dhe Gardës lidhur me lënien jashtë Kryeministrisë të pistoletave të tyre.
Në reagimin e tij, Rama e cilësoi deklaratën e BKH-së si një simptomë shqetësuese të “sëmundjeve të vjetra” që, sipas kryeministrit, vijojnë të shfaqen në organizmat e drejtësisë së reformuar.
Kryeministri sqaroi se kritika e tij nuk kishte të bënte me armëmbajtjen pa leje, siç është interpretuar nga BKH-ja, por me atë që ai e quan mungesë etike dhe ligjore, e cila i shtyu efektivët të kërkonin të hynin të armatosur në ambientet e Kryeministrisë. Sipas Ramës, ky fakt pranohet edhe në vetë deklaratën e BKH-së.
Ai shtoi se, nëse do të bëhej fjalë për një rast të izoluar, nuk do ta kishte përmendur në kontekstin e qëndrimit të tij të përgjithshëm, por theksoi se ky ishte vetëm një nga disa episode, madje “më i ëmbli” prej tyre, që sipas tij tregojnë boshllëqe serioze etike dhe profesionale tek disa anëtarë të kësaj strukture.
Në përfundim, kryeministri bëri thirrje për një reflektim serioz, profesional dhe ndërinstitucional, me synimin për të garantuar suksesin e Reformës në Drejtësi. Ai theksoi rëndësinë e ndarjes së drejtësisë së pavarur nga mendësitë e vjetra dhe keqkuptimet e reja, duke nënvizuar se pavarësia dhe cilësia e gjyqësorit duhet të mbrohen, por pa lejuar që, sipas tij, “kura të kthehet në një problem më të madh se sëmundja”, duke rrezikuar liritë, të drejtat, si dhe funksionimin e administratës dhe ekonomisë së vendit.
