Pas drejtorit të ARRSH, edhe deputeti i PS, Olsi Komiçi, është i bindur se rrëshqitja e dherave në aksin Librazhd–Prrenjas ishte fenomen natyror, dhe jo pasojë e punimeve tek traseja e re rrugore që po ndërtohet pak më sipër.
Në një reagim në Facebook, Komiçi shprehet i bindur se firma dhe qeveria nuk kanë asnjë faj dhe për këtë arsye kritikat nuk e kompleksojnë.
“Pas rreth shtatë orë pune pa pushim, me dy fadroma e tre skrepa të fuqishëm, firma që mirëmban këtë segment të rrugës nacionale bëri të mundur hapjen e saj, duke e bërë atë të aksesueshme për të gjithë qytetarët që ishin duke kaluar dhe u bllokuan në këtë aks rrugor. Vërtet, vonesa ishte e madhe, por jeta e njeriut vlen mbi gjithçka; lavdi zotit nuk pati viktima. Të thuash për shembjen e atij masivi aq të madh shkëmbor, një fenomen natyror, që fajin e ka firma apo e ka qeveria, është për të qeshur e për të qarë. Nuk kompleksohemi,” shkruan Komiçi.
Pavarësisht reagimit të deputetit të PS, që është për “të qeshur e për të qarë”, kujtojmë se në vendin ku ndodhi shembja dhe bllokoi qarkullimin për tetë orë, pak më sipër mjetet e rënda po punojnë për ndërtimin e segmentit të ri rrugor, në kuadër të projektit të Koridorit VIII.
Pyetja që duhet t’i japë përgjigje Komiçi që qytetarët ta besojnë, është: pse ky fenomen natyror ndodhi pikërisht tani kur në zonë bëhen punime, dhe jo në kaq vite që ekziston ky aks?
