Një ditë pasi Grupi Parlamentar i PS ka propozuar ndryshime ligjore në Nenin 242, e ngarkuara me Punë e SHBA-së në Tiranë, Nancy VanHorn ka mbërritur sot në Kuvendin e Shqipërisë, ku është pritur në takim nga kryetari i Parlamentit, Niko Peleshi.
Mësohet se VanHorn do të zhvillojë gjithashtu dhe një takim me kreun e Grupit Parlamentar të Partisë Socialiste, Taulant Balla.
Deri më tani nuk dihet se kush është arsyeja e këtij takimi.
Kujtojmë se socialistët, me në krye kryeministrin Rama, bënë me dije se do të ndryshonin nenin 242 të Kodit të Procedurës Penale, duke i hequr të drejtën gjykatave që të marrin vendime pezullimi ndaj kryeministrit, ministrave, Presidentit, Avokatit të Popullit dhe kreut të KLSH-së.
Ndryshimet ligjore të propozuara, vijnë pasi Gjykata Kushtetuese rrëzoi për mungesë kuorumi pretendimet e Ramës se pezullimi i Belinda Ballukut nga Gjykata e Posaçme ishte shkelje e kushtetutës.
