Duket se në Shqipëri, për të hapur diskutime serioze në Kuvend, duhet më parë të ndodhin tragjedi. Vetëm pas vrasjes së dy fëmijëve të pafajshëm në Durrës, deputetët “kujtohen” se ekziston edhe Kodi Penal dhe se ai mund të ketë nevojë për ndryshime.
Në seancën e sotme plenare, deputeti socialist Erion Braçe shprehu indinjatën e tij për ngjarjen, duke kërkuar që drejtimi i automjetit në gjendje të dehur të trajtohet si vrasje me dashje. Një reagim i fortë, por që vjen vetëm pasi dy familje kanë hapur dyert e mortit.
Braçe denoncoi atë që e cilësoi si “normalizim të krimit”, duke theksuar se autorë të tillë shpesh përfundojnë të lirë pas pak ditësh, ndërsa ata me mundësi financiare e zgjidhin situatën me pagesa të menjëhershme.
Pas tij, edhe Taulant Balla u bashkua me zellin e momentit, duke kërkuar ndryshime në Kodin Penal dhe duke i bërë thirrje Policisë së Shtetit të “bëjë shembull” të fortët e lagjeve, një kategori që, mesa duket, ka ekzistuar në heshtje deri dje dhe që sot papritur kërkon aksion të menjëhershëm.
Mes retorikës nga mikrofoni i Kuvendit dhe toneve të dhimbshme, mbetet një pyetje e thjeshtë: pse duhet gjithmonë një tragjedi për të sjellë ndërgjegjësim? Dhe sa jetë të tjera duhen që reagimi të mos jetë thjesht i radhës, por realisht efektiv?
