Një takim i organizuar me anëtarë dhe simpatizantë të Partisë Demokratike në zonën e ish-Kënetës në Durrës nuk kaloi pa tone kritike. Gjatë bashkëbisedimit, një prej demokratëve i është drejtuar drejtpërdrejt Sali Berishës me një mesazh të qartë për organizimin dhe përfaqësimin në parti.
“Deputetët që janë këtu, kaq sa janë, të dalin para nesh, të shkojnë nëpër shtëpi, të vënë në lëvizje zgjedhësit se nuk janë pak dhe të vazhdojnë të organizohen. Këtu nuk njihet as kush është kryetar partie. Ne duam një kryetar që të na përfaqësojë”, është shprehur ai.
Deklarata vjen në një moment kur Partia Demokratike vijon të përballet me sfida të brendshme organizative dhe përçarje që kanë reflektuar në terren. Kritika e drejtpërdrejtë në prani të Berishës nxori në pah pakënaqësinë e një pjese të bazës për mungesën e strukturimit dhe komunikimit të qartë me elektoratin.
