Kryeministri Edi Rama, duke folur për situatën e zjarreve gjatë verës, theksoi nevojën për reagim të shpejtë dhe investime të menjëhershme për të përballuar këtë sfidë mjedisore.
Gjatë një takimi mbi prioritetet e mjedisit, biodiversitetit dhe pyjeve, Rama njoftoi se do të ketë monitorim me dronë të pyjeve në vend dhe theksoi rëndësinë e rritjes së sipërfaqes së pyllëzuar. Ai shtoi gjithashtu se do të fuqizohen kapacitetet e prodhimit të fidanëve përmes teknologjisë.
“Nevoja për të rritur kapacitetet tona për pyllëzim është më e madhe çdo vit. Askush nuk i ka gjetur ilaç zjarreve, që kur vijnë, shkaktojnë dëme kolosale. Por nuk mund të përsërisim të njëjtën gjë; duhet të reagojmë dhe të investojmë pa humbur kohë,” tha Rama.
Kryeministri njoftoi se janë angazhuar burime të reja financiare për përdorimin e teknologjisë dhe dronëve, që sigurojnë më shumë saktësi dhe eficencë në monitorimin e pyjeve. Ai shtoi se plani i Ministrisë së Mjedisit do të shfrytëzojë edhe mundësitë që ofron Inteligjenca Artificiale për të rritur kapacitetin e fidanishteve publike.
Rama theksoi gjithashtu një ndryshim ligjor që obligon ndërtuesit në Shqipëri të kontribuojnë për gjelbërimin, duke forcuar kështu strategjinë kombëtare për pyllëzimin dhe mbrojtjen nga zjarret.
