Nuk ka paqe për kadastrën e Vlorës. Pas vetëm pesë muajsh në krye të institucionit, Genc Deromemaj ka dhënë dorëheqjen. Arsyet zyrtare ende nuk janë bërë publike, por burime bëjnë me dije se ai nuk do të vijojë më në pozicion drejtues.
Deromemaj, ish-drejtues lokal i PD në Vlorë, u emërua në krye të kadastrës pas një procesi që u shoqërua me debat politik, për shkak të afrimit të disa ish-demokratëve me qeverinë e Edi Ramës. Emërimi i tij u lexua nga një pjesë e opozitës si pjesë e këtij fenomeni, duke shkaktuar përplasje të brendshme dhe kritika për “bashkëpunim politik”.
Dorëheqja e tij shton sërish lëvizjet e shpejta në drejtimin e kadastrës së Vlorës, një institucion që prej vitesh mbetet në qendër të kritikave dhe akuzave për procedura të bllokuara, konflikte pronësie dhe tensione politike.
Deri tani nuk ka një koment zyrtar nga vetë Deromemaj apo nga Agjencia Shtetërore e Kadastrës për arsyet e largimit dhe se kush do ta zëvendësojë atë në detyrë. Institucioni pritet të drejtohet përkohësisht nga një zëvendësdrejtues, derisa të caktohet emri i ri.
