Ministrja Diella, e njohur më shumë si sensacion mediatik sesa për ndonjë punë konkrete, u shfaq sot “live” në Athinë për Festën Kombëtare të Shqipërisë. Sigurisht, gjithçka normale deri këtu, pasi Diella është një kompjuter që duket vetëm në monitor.
Çudia e vërtetë është serioziteti që mazhoranca i kushton Diellës. Deputeti socialist Taulant Balla njoftoi se ministrja do të takohet me homologët grekë dhe zyrtarë të lartë.
“Bashkë me Ministren Diella sonte në Athinë, në Festën Kombëtare të Shqipërisë për tu takuar me ministra të Qeverisë greke, deputetë, ambasadorë dhe shumë motra dhe vëllezër shqiptarë që jetojnë në Greqi”, shkruan Balla.
Është e paqartë se si do i zhvillojë këto takime “Diella” me homologët grekë? Greqia nuk ka shpallur ndonjë ministre virtuale që Diella të ketë kolege. Por edhe nëse homologu i saj është një person real, mbetet e paqartë se si do komunikojë një kompjuter me një ministër njeri? Nga e di Diella se çfarë do bisedojë me deputetët, ambasadorët dhe ministrat e qeverisë greke?!
Vetëm nëse Balla ia ka bërë gati të gjitha, axhendën, fjalimet dhe diskutimet që do bëjë dhe në çdo takim do ta ndez dhe do ta fik Diellën për t’i realizuar këto takime.
Pra, duket se diplomacia shqiptare ka gjetur mënyrën më moderne për të bërë marrëveshje, një klikim dhe “ministrja” është gati.
