Në datën 30 shtator 2025, Gjykata e Lartë përmbylli procesin e përzgjedhjes së anëtarit të ri të Gjykatës Kushtetuese, për të zëvendësuar vakancën e krijuar nga largimi i gjyqtares Holta Zaçe, e cila mbante edhe detyrën e kryetares së gjykatës.
Sipas vendimit nr. 2, datë 30.9.2025, rezultati i votimit ishte si më poshtë:
• Asim Vokshi – 6 vota
• Naureda Llagami – 8 vota
• Florian Ballhysa – 0 vota
• dhe një fletë votimi e pavlefshme.
Meqë asnjë kandidat nuk arriti shumicën e kërkuar prej 3/5 e votave, sipas ligjit fitues shpallet kandidati i renditur i pari nga Këshilli i Emërimeve në Drejtësi, në këtë rast Asim Vokshi.
Vendimi iu përcoll menjëherë Presidentit të Republikës, Kuvendit dhe Gjykatës Kushtetuese dhe u botua në Fletoren Zyrtare më 2 tetor 2025, duke e bërë procesin të plotë dhe formalisht të përfunduar.
Megjithatë, prej gati një jave, procesi mbetet i pezulluar, pasi mungon vetëm një hap: betimi para Presidentit të Republikës. Presidenca nuk ka organizuar ceremoninë solemne të betimit, duke e lënë emërimin në vendnumëro.
Kjo vonesë, në pamje të parë formale, ka pasoja të drejtpërdrejta në funksionimin e Gjykatës Kushtetuese, e cila aktualisht operon me një anëtar më pak, pas dorëheqjes së gjyqtares Elsa Toska.
Në këto kushte, vendimet merren nga një trupë e cunguar, në të cilën Holta Zaçe, me mandat të përfunduar, vijon të ushtrojë detyrën dhe të drejtojë gjykatën, përfshirë edhe çështje me ndjeshmëri të lartë politike, si ajo e kushtetutshmërisë së zgjedhjeve në Tiranë.
Për ironi, vetë Presidenti i Republikës ka një kërkesë të depozituar në Gjykatën Kushtetuese që prej 30 janarit 2025, e cila nuk është shqyrtuar ende pas më shumë se nëntë muajsh.
Në këtë situatë, çdo vonesë e mëtejshme në betimin e gjyqtarit të ri ngjall dyshime të arsyeshme se heshtja e Presidencës nuk është e rastësishme.
Ndërkohë, në rastin e dekretimit të datës së zgjedhjeve për Bashkinë e Tiranës, Presidenti reagoi me shpejtësi të menjëhershme, pa respektuar detyrimin kushtetues që parashikon pezullimin e procedurës kur ndaj një vendimi të shkarkimit paraqitet ankim në Gjykatën Kushtetuese. Sot, për ironi, në rastin e betimit të një gjyqtari të përzgjedhur ligjërisht, i njëjti institucion hesht.
Në këtë mënyrë, vendimin për një nga çështjet më të ndjeshme politike — atë të kushtetutshmërisë së zgjedhjeve në Tiranë — pritet ta marrë Holta Zaçe me mandat të mbaruar, e njëjta që delegoi shefen e kabinetit të saj si shefe kabineti të Edi Ramës.
Në këto rrethana, Presidenti duhet të veprojë menjëherë, duke organizuar ceremoninë e betimit të Asim Vokshit, për të mbyllur një proces të ligjshëm dhe për të garantuar funksionimin normal e të plotë të Gjykatës Kushtetuese.
