Dega e PD në Kukës ka reaguar ashpër ndaj takimit të zhvilluar nga ish-deputeti Ervin Salianji me përfaqësues të kësaj force politike në qytetin verior, duke e cilësuar atë si një përpjekje për përçarje brenda partisë.
Në një deklaratë zyrtare, dega lokale e PD-së e ka konsideruar mbledhjen si një “akt politik të shëmtuar” dhe një takim privat që, sipas saj, nuk përfaqësonte strukturat apo anëtarësinë e vërtetë të partisë në Kukës.
Sipas reagimit, në takim nuk kanë marrë pjesë demokratë të qytetit, por një grup i vogël individësh që nuk përfaqësonin asnjë strukturë zyrtare dhe as vullnetin e bazës. “Ky nuk ishte takim me demokratët e Kukësit”, thuhet në deklaratë, duke theksuar se tentativa e Salianjit për të krijuar perceptimin e një lëvizjeje të re është larg realitetit të Partisë Demokratike.
Dega e PD Kukës thekson besnikërinë ndaj drejtimit të Sali Berishës, duke thënë se mbetet e bashkuar dhe refuzon çdo përpjekje që cenon unitetin e opozitës në një moment të rëndësishëm politik.
“Partia Demokratike e Kukësit qëndron e bashkuar, e fortë dhe plotësisht besnike ndaj udhëheqjes së Prof. Dr. Sali Berishës”, thuhet në deklaratë.
Në fund të deklaratës, ndonëse bashkia ka disa vite që drejtohet nga socialistët, PD Kukës nënvizon se qyteti ka qenë dhe do të mbetet një bastion i fortë i Partisë Demokratike, duke shprehur mbështetje për udhëheqjen aktuale.
