Vijon përplasja mes Nokës dhe Salianjit/ Noka: Po punon për të tjerët, Salianji: Mendova se do rrëzonim Ramën, se dija që armiku isha unë.
Mbledhja e Kryesisë së PD në selinë blu po vijon akoma. Nga burime mediatike mësohet se Noka dhe Salianji po debatojnë ashpër me akuza dhe kundër akuza, ku sulmet janë me fokus takimet e ish deputetit.
Sipas sekretarit të Përgjithshëm të PD-së, Noka, Salianji po punon për PS. Ndërsa ky i fundit, Salianji ka reaguar ashpër, duke i kërkuar Nokës dorëheqjen. “Jep dorëheqjen Flamur, e ke shkatërruar partinë dhe gabimi me Avokatin e Popullit është përgjegjësi e jotja”, mësohet të ketë thënë Salianji gjatë debatit.
Burimet bëjnë me dije se tonet në mbledhje kanë qenë mjaft të larta dhe debatet të ashpra, ndërsa përplasjet kanë vijuar edhe pas këtij momenti. Në një tjetër reagim, Salianji është shprehur se vëmendja e Kryesisë po devijohet nga beteja politike me qeverinë.
“Sot mendova se e kishim mbledhjen për të rrëzuar Ramën, e paskeni me mua. Po e zhvendosni vëmendjen plotësisht nga Rama”, citohet të ketë deklaruar ai.
