Mediat ndërkombëtare, përfshirë britaniken Daily Mail dhe Al Jazeera, i kanë kushtuar vëmendje protestës së opozitës të mbajtur në Tiranë, ku tubimi u shoqërua me tensione dhe përplasje mes protestuesve dhe forcave të rendit.
Sipas raportimeve ndërkombëtare, mijëra qytetarë u mblodhën në qendër të kryeqytetit për të kërkuar largimin e qeverisë së drejtuar nga kryeministri Edi Rama. Gjatë protestës u shënuan incidente, ku një pjesë e demonstruesve hodhën kokteje Molotov, fishekzjarrë dhe mjete të tjera drejt policisë dhe godinave shtetërore. Në përgjigje, forcat e rendit përdorën gaz lotsjellës dhe topa uji për shpërndarjen e turmës.
Përplasjet u shtrinë edhe pranë ndërtesës së Parlamentit, ndërsa nga incidentet mbetën të plagosur të paktën 16 persona dhe u arrestuan rreth 13 protestues.
Protesta u zhvillua në një klimë të tensionuar politike, teksa qeveria përballet me akuza për korrupsion, ku përfshihet edhe zëvendëskryeministrja dhe ministrja e Infrastrukturës dhe Energjisë, Belinda Balluku. Opozita ka kërkuar dorëheqjen e saj dhe të kryeministrit Rama, ndërsa tubime të ngjashme janë zhvilluar edhe muajt e fundit.
Lideri i opozitës, Sali Berisha, e ka cilësuar protestën si një “kryengritje paqësore”, ndërsa analistët politikë vlerësojnë se situata politike në vend mbetet e polarizuar dhe se protestat mund të mos sjellin ndryshime të menjëhershme politike.
Shqipëria vijon procesin e integrimit në Bashkimin Europian dhe synon mbylljen e negociatave deri në vitin 2027, megjithëse korrupsioni mbetet një nga sfidat kryesore të evidentuara nga partnerët ndërkombëtarë.
Në raportimin e saj, Al Jazeera thekson përdorimin e gazit lotsjellës dhe ujit ndaj protestuesve, si dhe përplasjet e ndodhura pranë institucioneve kryesore shtetërore gjatë demonstratës në Tiranë.
