Kreu i Komisionit Qendror të Zgjedhjeve, Ilirjan Celibashi, ka reaguar pas publikimit të raportit përfundimtar të OSBE/ODIHR për zgjedhjet parlamentare të 11 majit 2025.
Në një deklaratë publike, Celibashi e cilësoi raportin si “pasqyrë të plotë të procesit zgjedhor”. Kryekomisioneri i drejtoi gishtin politikës duke theksuar se puna mbi gjetjet dhe rekomandimet e ODIHR-it do të tregojë seriozitetin dhe përgjegjshmërinë institucionale e politike të të gjithë aktorëve të përfshirë.
“Do të jetë shenjë serioziteti dhe përgjegjshmërie institucionale dhe politike e të gjithë aktorëve të lidhur me procesin zgjedhor, për të punuar mbi gjetjet dhe rekomandimet e Raportit Final të ODIHR-it për zgjedhjet e 11 majit, si pasqyrë e plotë e këtyre zgjedhjeve”, u shpreh Celibashi.
Ai shtoi se “gjykimet dhe vlerësimet mbi gjykimet e ‘gjykatësit të zgjedhjeve’ nuk kanë ndonjë dobi”, duke iu referuar rolit të ODIHR-it si institucion monitorues duke pretenduar të vinte pikat mbi “i” e duke i treguar me atë rast kufijtë politikës. Por duke harruar se me komentet e veta për raportin, po bënte ekzaktesisht atë që po u ndalonte të tjerve t’a bënin, ose në rastin më të mirë po i këshillonte që të përmbaheshin.
Kryekomisioneri nënvizoi se partitë politike, veçanërisht ato që janë në Kuvend, duhet të angazhohen seriozisht për ta përmbyllur reformën zgjedhore brenda një viti. Kjo tingëllon si detyrë për maxhorancen e Kryeministrit Rama, sa kohë që votat që duhen për këtë Kryeministri i ka me bollëk.
Sa i takon vetë KQZ-së, Celibashi tha se vlerësimet pozitive të raportit për punën e institucionit në përgatitjen dhe administrimin e zgjedhjeve janë “shtysë për të bërë akoma më mirë atë që duhet bërë”.
