Këshilltari demokrat në Bashkinë e Durrësit, Dritan Burgija, ka reaguar publikisht pas vendimit për përjashtimin e tij nga Partia Demokratike, duke deklaruar se për lajmin u informua përmes mediave. Në një intervistë për A2CNN, ai u shpreh se e ka pritur situatën me sportivitet, duke theksuar se kontributi i tij në parti nuk mund të mohohet nga askush.
“U njoha nga mediat me lajmin. Nuk dija të qeshja a të qaja kur mora vesh lajmin. E mora me sportivitet sepse e njoh veten dhe nuk ka shans askush të më zerojë kontributet në Partinë Demokratike”, tha Burgija.
Burgija kritikoi ashpër mënyrën e vendimmarrjes brenda partisë, duke theksuar se kishte mbështetur rikthimin e Berishës që në PD të vlersohej meritokracia.
Ai shtoi se nuk ishte njoftuar zyrtarisht nga asnjë strukturë e partisë, qoftë në nivel lokal apo qendror, përpara marrjes së vendimit. Sipas tij, aktualisht struktura drejtuese po përdor autoritetin për të përjashtuar anëtarë pa arsye dhe pa transparencë, duke e krahasuar këtë situatë me praktika të komunizmit.
“Kam luftuar shumë që vula t’i shkojë Sali Berishës, jo si person, por që PD-ja të kthehej në shina, të vlerësonte meritokracinë. Por, sot jemi para faktit që ajo vulë po përdoret për të përjashtuar demokratë pa arsye dhe pa fakte. U kthyem në komunizëm, kur dënoheshe pa e ditur se për çfarë”, shtoi Burgija.
Burgija aludoi se përjashtimi mund të lidhet me angazhimin e tij në një aktivitet politik në Durrës, ku kishte mbështetur publikisht ish-deputetin, Ervin Salianji.
