Pas raportit përfundimtar të OSBE/ODIHR që certifikon devijimet e rënda në zgjedhjet e 11 majit dhe ndërhyrjen e pushtetit në procesin demokratik, deputeti i Partisë Demokratike Bujar Leskaj ka bërë publike hapat konkretë që ka ndërmarrë dhe që kërkon të ndiqen brenda PD-së, si pjesë e një procesi reflektimi dhe përgjegjësie politike.
Leskaj konfirmon se menjëherë pas zgjedhjeve ka dhënë dorëheqjen si drejtues politik të qarkut Vlorë, duke e cilësuar këtë një akt detyrimi moral dhe politik përballë rezultatit elektoral. Ai bën të ditur se pas dy vitesh do të lërë mandatin e deputetit, duke ia kaluar kandidatit pasardhës në listë, si pjesë e modelit të qarkullimit elitar dhe hapjes së PD-së ndaj energjive të reja.
Në qëndrimin e tij, Leskaj thekson se e njëjta përgjegjësi duhet të kërkohet nga të gjithë drejtuesit politikë të PD-së:
ata që nuk fituan në qarqet e tyre duhet të mbajnë përgjegjësi dhe të largohen, për t’i hapur rrugën profileve të reja politike që gëzojnë mbështetje në terren.
Sipas tij, ky nuk është thjesht moment deklarimesh, por i reformimeve të thella dhe konkrete. Prandaj, Leskaj kërkon që PD të ristrukturohet në çdo qelizë të saj — nga baza deri te kryetari, duke rikthyer frymën e Rithemelimit, transparencën, llogaridhënien dhe votën e anëtarësisë si themel të demokracisë së brendshme.
“Ky është momenti i përgjegjësisë. Pa qarkullim të vërtetë, pa hapje, pa llogaridhënie dhe pa reformim të plotë nga dega te kryetari, PD nuk mund të rikthehet si forcë shprese dhe besimi për qytetarët,” nënvizon Leskaj.
