Deputeti i PS, Erion Braçe, ka paralajmëruar se do të depozitojë kallëzim penal ndaj Drejtorisë së Tatimeve dhe institucioneve të tjera shtetërore, të cilat sipas tij nuk kanë respektuar afatet ligjore për kthimin e përgjigjeve ndaj kërkesave për informacion.
Braçe bëri me dije se më 2 shkurt ka depozituar një kërkesë për seancë pyetje-përgjigje me ministren e Arsimit, por deri më tani nuk ka marrë përgjigje, ndonëse – sipas tij – ka kaluar afati maksimal trejavor që parashikon Rregullorja e Kuvendit.
Ai ngriti shqetësimin edhe për situatën në shkollën “Edit Durham”, e cila, megjithëse ka përfunduar, ende nuk është vënë në funksion. Sipas Braçes, për shkak të kësaj situate, rreth 1700 nxënës zhvillojnë mësimin në turnin e dytë.
Deputeti socialist kritikoi gjithashtu mënyrën se si menaxhohet koha në Kuvend, duke theksuar se çështjet e rëndësishme trajtohen “me racion”, ndërsa koha shpërdorohet për tema jashtë rendit të ditës.
Braçe shtoi se ka një seri kërkesash për marrje informacioni drejtuar Tatimeve dhe AKU-së, për të cilat – sipas tij – janë ezauruar të gjitha afatet ligjore pa marrë përgjigje. “Do të shkojmë drejt një kallëzimi penal për të marrë informacionin,” deklaroi ai.
