Vetëm pak ditë pasi u bë protagonist i përplasjeve me policinë në bulevard, ku flakët e revoltimit opozitar premtonin përmbysje epokale, Luciano Boçi ka vendosur t’i ndërrojë skenat e betejës me kolltukët komodë të dëgjesave publike.
Në vend të përballjeve me gazin lotsjellës, Boçi ka zgjedhur shoqërinë e "arkitektit" të pushtetit lokal të Rilindjes, Arbi Mazniku, për një tur turistik-administrativ që këtë radhë ndalon në Lezhë.
Siç ka mësuar VNA, të dy bashkë, si bashkëkryetarë të Komisionit Parlamentar të Reformës Administrative, do të nisin të enjten turet nëpër Shqipëri, krah për krah, për të mbledhur mendime.
Skenari është pothuajse poetik: ora 17:00, 22 prill, vendi: Qendra Kulturore e Fëmijëve.
Në rendin e ditës, "çifti" i ri i reformës do të luajë me tre shtylla:
Shtylla 1: Territori dhe qeverisja
Shtylla 2: Funksionet dhe shërbimet
Shtylla 3: Financat vendore
Ndërsa demokratët poshtë dritares së liderit presin sinjalin për "mosbindje civile", nënkryetari i tyre duket se ka gjetur "bindjen civile" në tavolinat e Komisionit të Posaçëm. Është vërtet prekëse të shohësh sesi dhuna e policisë harrohet sapo vjen puna te Raundi i plotësimeve dhe Prioritizimi.
Nuk dihet nëse Boçi do t'i kërkojë Maznikut llogari për "shkopinjtë e gomës" mes diskutimeve për kompetencat e bashkive, apo nëse do të mjaftohen me një buzëqeshje korteze pas mbylljes së dëgjesës.
