Sot në Kolegjin Zgjedhor u shqyrtua kërkesa e demokratës Andia Ullirit për marrjen e mandatit të deputetit. Ulliri kërkonte rrëzimin e vendimit të KQZ-së që i kishte dhënë mandatin Arjan Ndojas.
Në seancë, Andia Ulliri u përfaqësua nga avokati Indrit Sefa, ndërsa Arjan Ndoja nuk ishte i pranishëm dhe përfaqësohej nga avokati Rexhë Margjeka. Avokati i ish-prokurorit kërkoi që të mos legjitimohej Ulliri si palë ankimuese.
Pas shqyrtimit, trupi gjykues vendosi pushimin e çështjes, duke argumentuar se Ulliri nuk legjitimohet si palë paditëse.
Kandidatja demokrate kishte ankimuar më parë vendimin e Komisionit të Ankimimeve dhe Sanksioneve dhe të kryekomisionerit Ilirjan Celibashi, të cilët kishin rrëzuar kërkesat e saj, me arsyetimin se lista e hapur dhe ajo e mbyllur funksionojnë të ndara.
Andia Ulliri ka kandiduar në listat e Partisë Demokratike-Aleanca për Shqipërinë Madhështore në qarkun e Durrësit dhe kërkon t’i marrë mandatin Arjan Ndojas për shkak të kuotës gjinore.
