Kreu i Partisë Demokratike, Sali Berisha, deklaroi në konferencën e sotme për shtyp se protestat e nisura nga PD përbëjnë, sipas tij, të vetmen rrugë për rrëzimin e kryeministrit Edi Rama nga pushteti.
Berisha u shpreh se qytetarët opozitarë duhet të jenë të qartë se ndryshimi nuk do të vijë përmes dhunës apo armëve, por përmes një revolte të qëndrueshme, paqësore dhe të përditshme, e cila duhet të vazhdojë deri në largimin e Ramës.
“Kjo opozitë ka organizuar në historikun e saj protesta nga më madhështoret dhe revolta nga më të suksesshmet. E ka këtë histori, ka përmbysur sistemin e diktaturës dhe regjimin e vitit 1997 me votë,” u shpreh Berisha, duke shtuar se opozita sot, ndonëse jo pa potencial, ka mbetur e fragmentuar.
Sipas tij, rruga e përmbysjes së qeverisë aktuale nuk është përshkallëzimi i konfliktit, por presioni i vazhdueshëm qytetar përmes protestave paqësore.
Megjithatë, gjatë konferencës për shtyp, Berisha nuk bëri asnjë koment për përjashtimin de facto të deputetit Ervin Salianji nga strukturat drejtuese të PD-së. Ai nuk përmendi asnjë plan konkret për bashkimin e forcave me partitë e tjera opozitare dhe as ndonjë kalendar apo strategji të qartë për aksionin opozitar në vijim.
Aksioni politik i opozitës, sipas deklarimeve të deritanishme, pritet të vijojë pas festave të fundvitit, por pa një datë të përcaktuar dhe pa një plan të artikuluar publikisht.
