Kryetari i Partisë Demokratike, Sali Berisha, deklaroi këtë të martë se opozita tërhiqet totalisht nga procesi i zgjedhjes së Avokatit të Popullit, duke e cilësuar atë një farsë të orkestruar nga mazhoranca.
Berisha tha se mazhoranca ka bërë një lojë të turpshme, pasi fillimisht kishte deklaruar publikisht se do t’ia linte opozitës këtë post, por më pas ka shtuar kandidaturën e saj, atë të Endri Shabanit. Sipas tij, opozita ka tërhequr firmat për kandidaturat që nuk janë paraqitur prej saj.
Ai akuzoi kryetarin e Komisionit të Ligjeve, Ulsi Manja, se refuzon të njohë tërheqjen e firmave, ndërsa theksoi se Partia Demokratike kishte paraqitur disa kandidatura serioze, mes tyre Besim Ndregjoni, Adriana Kalaja, Jola Hysaj dhe Aranita Brahaj.
Në këto kushte, Berisha konfirmoi se opozita nuk do të marrë pjesë në votimin për Avokatin e Popullit në Kuvend, duke e cilësuar procesin të turpshëm dhe të papranueshëm.
